حملة مخابراتية لتعويم السيسي: "كل ما تتزنق إعمل توقيعات"

استقبلت منصات التواصل الاجتماعي حملة جمع 40 مليون توقيع، لبقاء الرئيس المصري، عبدالفتاح السيسي، لفترة رئاسية ثانية، بدون انتخابات، بكثير من الريبة ثم السخرية. ما دفع بعضهم إلى تدشين حملة يتساءلون فيها #مشكلتك_إيه_مع_السيسي؟ ليكتشفوا أن كثيرين لهم مشاكل كبيرة معه، كما دشن آخرون وسم #40_مليون_توقيع أعرب معظمهم عن رفضه لحملة التوقيع المخابراتية الجديدة، كما وصفها الناشطون.

ففاطمة سخرت بقولها: "‏يا جماعة اعقلوا الكلمة، 40 مليون توقيع ايه بس اللي بيلموهم للسيسي ..هو الناس اللي فاضلين برا السجون يطلعوا كام #مشكلتك_ايه_مع_السيسي".

وسخر "ناشط غير سياسي"، من الحملة، فكتب: "‏حملة لجمع 40 مليون توقيع لمد فترة حكم السيسي 8 سنوات، مش محتاجة حملة، الورق ورقنا والدفاتر دفاترنا وامضى يابو العلا"، ورد عليه صالح: "يعني انت صدقت حملة تمرد و6/30 والانتخابات وجمعة التفويض لمحاربة الإرهاب، ولحد دي مش مصدق وامضي يابو العلا".

في حين زاد إسلام في عدد السنين وغرد ساخراً: "8 سنين؟! خليهم 16 يا راجل ده الرئيس السيسي إنجازاته مغرقة الدنيا، والإيرادات بلهبل، والسياحة كل يوم في الطالع، وتحيا مصر 19 مرة".

وسخر محمود: "40 مليون توقيع! ده انت لو عندك 40 مليون متعلم ويعرف يمضي، ما كنتش شفت الكرسي أساساً"، ووافقته "جنى الجنتين" وقالت: "طيب هو لو معاه 40 مليون توقيع ايه اللي يخليه ينزل الانتخابات #مشكلتك_ايه_مع_السيسي إن في بشر لسه مصدقينه".

وعلق عادل: "لا أمن ولا أمان، ولا عقل ولا تعقل، ولا دين ولا تدين، ولا إسلام ولا سلام، ولا شغلة ولا مشغلة، #مشكلتك_ايه_مع_السيسي"، ووافقه "الباشمهندس" وقال: "#مشكلتك_ايه_مع_السيسي، ولا حاجه هو يا دوب قتله يجي 5000 واحد، و دمر الاقتصاد، وحبس الشباب، وطبع مع إسرائيل، وضيع مصر، غلى اللأسعار .. بس كده".

وسخر اسماعيل: "قال يعني لو مجمعوش 40 مليون توقيع فترة رئاسة السيسي مش هتمتد 8 سنين"، وذكّر شريف بحملة مماثلة وقال: "حملة لجمع 40 مليون توقيع لمدة فترة رئاسة السيسي 8 سنوات! مش ده عملها الحزب الوطني للموافقة على جيمي رئيس؟ هو مفيش إبداع أبداً حضرتك".

وسخر عمر: "يا باشا 40 مليون توقيع لاربعين سنة كمان.. احنا هنلاقي زيك فين يا ريس". وقالت لولو "حملة لجمع 40 مليون توقيع لمد فترة رئاسة السيسي 8 سنوات! انا موافقة وفرحانة وشمتانة".

بينما، علق ناشطون، بمضمون متقارب: "كل ما تتزنق إعمل حملة توقيعات.. قبل كدة شلت رئيس منتخب بتمرد.. ودلوقتي عاوز تسيب السيسي 8 سنين من غير انتخابات.. إن لم تستح فوقع كما شئت".

وكان لافتاً لنظر رواد مواقع التواصل أن خبر الحملة تبنته مواقع مؤيدة للنظام، وفي المقدمة "اليوم السابع"، المعروفة بقربها الشديد من الجهات المخابراتية، فتوقع معلق أن يخرج لها علي جمعة قائلاً: "طوبى لمن وقع لهم ووقعوه".