تخفيف الحظر يثير جدلاً في مصر: "خلي كورونا ياخد باله"

وكتبت رشا عزب: ‏"أنا بس مش فاهمة حوار العودة للحياة الطبيعية، إنتو إمتى وقفتوا أصلاً عشان ترجعوا؟ هي الزحمة والمعجنة اليومية دي مش دليل علي الحياة الطبيعية المريعة؟... يا جماعة هو أي حد يحطلكم برسيم تاكلوا؟".

وعلقت إحسان: ‏"الفطار تقريباً على 6 ونص بنخلص على سبعة، يبقى كده العزايم هاتشتغل وفيه وقت يحلوا ويشيشوا ويروحوا قبل الحظر كمان، بس خلوا بالكم من المترو والأتوبيسات اللي هاتكون فوق بعضها كمان قبل الساعه 9! هو أكيد فيه حاجة مطمنة الحكومات إحنا مش فاهمينها".

وسخر مصطفى رأفت: "‏كل أما تزيد الحالات نقلل عدد ساعات الحظر، طبعاً حضراتكم أكيد واخدين بالكم عشان مانزهقش".

وشاركه أحمد كارم: ‏"المولات هاتتفتح لغاية الساعة 5 طوال الأسبوع، الحظر يبدأ من 9 مساءً لغاية 6 صباحاً بداية من الغد، المرور يبدأ تراخيص جديدة من أول الأسبوع الجاي، استئناف بعض خدمات الشهر العقاري، العودة للحياة الطبيعية بعد عيد الفطر. بالنسبة للكورونا: تخلي بالها بقى".

وعلق مصطفى: ‏"كمان أسبوع أو اتنين هايقدم ساعة كمان، وهكذا وهكذا لغاية ما يلغوا الحظر كله، فالأول وفي الآخر الدولة أهم حاجة عندها الاقتصاد، وأصحاب رؤوس الأموال مايهمهومش غير مصالحهم وبس".

وتساءلت نادين: "‏طب بجد كده يعني هو قافل المساجد ليه إذا كان هيفتح المولات والمحلات؟! ده مالوش معنى غير إنه استفزاز، وفعلاً مش هايفرق حاجة في انتشار العدوى.. الكلام ده للدول اللي واخدة الموضوع بجد".

وأضاف عمر همشري: ‏"في حاجة مش مفهومة يا جماعة، يعني منين بنقول الأعداد هتزيد فوق الـ200 حالة كل يوم، ومنين بنخفف الإجراءات ونقلل ساعات الحظر؟ طب ما هانتجمع نفطر كلنا عند بعض وننزل المولات نشتري وصباح الفل يعني!".

وأشاد عمر بالقرار: "‏قولتها وحاقولها تاني قرار الحظر في مصر كان غلط، والقرار اللي قبليه كان ملائم جداً لظروفنا، مصر أصلاً العادي بتاعها إنها زحمة، وانك تحشر الناس في ساعات محدوده حايزود الزحمة أكتر، أعتقد الحكومة اكتشفت الخطأ ده بس استحت تعترف، فقللت ساعات الحظر".

ووافقه محمود طلعت: "‏لما رئيس الحكومة د. مدبولي يقول النهارده بشكل واضح إن الإقتصاد المصري تأثر بالفعل من تبعات الوباء.. فالحقيقة إحنا مصدقين جداً جداً لإننا إتفجعنا في اقتصادياتنا الصغيرة المتواضعة.. ولذلك لابُد من التعايش والرجوع للعادي حتى ولو بالتدريج .. مافيش مساحة لأي عطلة تاني.. خلااااص".

وجاءت مشاركة أحمد عادل كتوقع: "‏لو الأعداد المُعلنة تزايدت لا نقلق، العالم كله هَيبدأ ياخد طريق العودة إلى الحياة الطبيعية تدريجياً؛ بسبب التأثير السلبي على الاقتصاد والحياة المعيشية بشكل عام .. في اعتقادي، عدد ساعات الحظر هتقل تدريجياً والحياة هترجع لطبيعتها".