رحلة مع كمال الشيخ في مشواره السينمائي الطويل (2/6)

يواصل المخرج الكبير كمال الشيخ حكاية المحطة الأولى في رحلته مع السينما، والتي بدأت في أروقة ستديو مصر، بعد أن قام الرائد السينمائي أحمد سالم بإحالته إلى قسم المونتاج على عكس ما كان يتمنى، ويكمل الحكاية قائلاً:

في الطريق من مكتب أحمد سالم إلى مكتب نيازي مصطفى، أخذت قرار إني لا أرفض الفرصة المتاحة حتى لو لم أكن أحبها، وبدأت فعلا أشتغل في قسم المونتاج مع الأستاذ العظيم نيازي مصطفى، وخليني أقول لك إني أنا يمكن لمدة سنة بقيت مثل العضو اللى بتزرعه والجسم يرفضه في الأول، وعشان كده فضلت لمدة سنة أشوف الشغل اللي بيحصل من بعيد، وفي المونتاج ما باعملش حاجة خالص، وما حدش بيطلب مني أعمل حاجة، لغاية ما حصل بعض التأقلم بيني وبين الناس اللى كانوا موجودين في قسم المونتاج، وخصوصًا الأستاذ أحمد كامل مرسي اللى كان مساعد لنيازي مصطفى وهو اللى ابتدا يوجهني إني أقرأ كتب عن السينما من مكتبة النهضة، واداني أساميها ورحت اشتريت أول كتاب بالإنجليزية كان اسمه (الفيلم) وقرأت هذا الكتاب في ثلاث أو أربعة أيام وتصورت إني أنا دلوقت خلاص بقيت مستعد للإخراج.

هذا الخاطر طبعًا بعد فترة من الوقت تباعد وحسيت إني لسه قدامي فترة طويلة جدًا لغاية ما أبقى دارس بهذه الكفاءة، وأدركت إنه من حسن حظي إن أنا اشتغلت في المونتاج كمساعد، تقدر تقول من المهم إنك تشتغل في الأول كمساعد ميكانيكي عشان تفهم حركة العربيات من الداخل، مساعد مونتاج معناه إني أنا أرتِّب النِمَر أو اللقطات وراء بعضها وبعدين أتعلم أكثر شوية وأكثر شوية وهكذا، بالتالي اتعلمت قواعد اللغة السينمائية، زي ما في قواعد للشعر لازم تتعلمها قبل ما تكتب شعر، وبالتالي تعلمت حرفة الإخراج من مهنة المونتاج ومن القراءات طبعًا ومن الأخطاء اللي بتشوفها في الشغل، طبعا من خلال عملي مع مخرجين متنوعين جزء من مهنتي كمونتير إني أطلع الأخطاء اللي في الشغل وأفكر في حلول ليها عشان أعرضها عليهم، ودي أكتر حاجة اتعلمت منها الإخراج، إنك تحل المشاكل اللي موجودة في العمل.

في الفترة دي اشتهرت جدًا وأخدت جائزة مركز أول في المونتاج، واستمريت في لفت النظر إلى عملي كمونتير، وبعدين لاقيت واحد من المنتجين جالي فجأة والظاهر إنه سمع عن شغلي مع المخرجين في حل المشاكل الموجودة في أفلامهم، فقال لي أنا عايزك تخرج لي فيلم، هو تصور إني هارحب جداً بالعرض بغض النظر عن أي تفاصيل.

المهم جاب الموضوع وقرأت الموضوع مبدئيًا، والإغراء في إني أنتقل من المونتاج إلى الإخراج كان كبير جدًا في هذه الفترة بالنسبة لي، وأي حد من زملائي يتمنى الحصول على فرصة زي دي، لكن مع ذلك لم أتعاقد على الفيلم، لأن الموضوع كان على نفس النمط الموجود في هذه الفترة، الميلودراما المليئة بالأغاني، وأنا كنت رافض هذا الأسلوب نهائياً، مع إني دي الأفلام اللي باعمل لها مونتاج، ولذلك فضلت التخلي عن حمل لقب (المخرج) ورفضت العرض وجابوا مخرج تاني، والرفض ده ساعدني على إني أتعرف على تكويني النفسي اللي بيرفض عمل شيئ غير مقتنع بيه تماماً.

ـ لكن بسبب هذه القدرة على الرفض، لسوء الحظ تأخر انتقالك من مقعد المونتير إلى مقعد المخرج طويلاً، وجاءت الفرصة بعد حوالي أربع أو خمس سنين من خلال فيلم (المنزل رقم 13)، كلمني عن هذه التجربة؟
قرأت في جريدة (المصري) الشهيرة وقتها خبر مثير عن طبيب في هولندا أجرى تجربة على أحد مرضاه، بإنه نوّمه تنويم مغناطيسي علشان يشوف تأثير هذا التنويم وإلى أي مدى يمكن أن يؤثر عليه، وادّى للمريض تعليمات إنه بعد التنويم هيروح حتة معينة وهيلاقي شخص معين، وادّى له مسدس، وبعدين تتبعه وتأكد إنه نفذ ما طلبه منه، يعني مش متذكر دلوقتي كل تفاصيل الخبر، لكن متذكر إنه جذب انتباهي جداً، وكنت ساعتها باشتغل في مونتاج أحد الأفلام، فسيطرت علي تفاصيل فكرة أصبحت بعد كده قصة فيلم (المنزل رقم 13) عن ربط الجريمة بالتنويم المغناطيسي، وبدأت أكون الأحداث، وده أخذ مني فترة لغاية ما بقيت مالي إيدي من السيناريو.

ـ الفيلم ظهر للنور سنة 52، وبعض النقاد اعتبر إن الفيلم مرتبط بالتغير الاجتماعي اللي أحدثته ثورة يوليو في المجتمع وبالتالي في السينما؟
لا الحقيقة ما كانش لتاريخ العرض ده أي دلالة من الحاجات اللي اتكتبت بهذا الشكل، لإني في الأصل بدأت التفكير في الفيلم سنة 1948 و قعدت كتير أشتغل فيه، وبعد ما انتهيت من كتابته تعبت في العثور على منتج يتحمس للفكرة. طبعا رفضي للعرض اللي جالي من المنتج، خلى علاقتي بالمنتجين تبقى أصعب، وعشان كده كان علي إني أتولى إنتاج فيلمي الأول بمجهودي كمخرج وكمونتير أيضاً، نفس الحكاية وحيد فريد الله يرحمه مدير التصوير أجل استلام أجره واشتغل معايا في الفيلم، ده اللي كنت أقدر أقدمه من الناحية الإنتاجية، ولحسن الحظ ستديو مصر وافق على إنه يديني سلفة توزيع وهي اللي أنتجت بيها الفيلم، وكان الفضل طبعا لستديو مصر في خروج فيلمي للنور، زي ما كان ليه الفضل في التحاقي بالسينما، ولحسن الحظ نجح الفيلم جدا لإنه كان مختلف، وبالتالي لم أخذل ستديو مصر، وفي نفس الوقت أكدت الثقة في إني ممكن أخرج فيلم كويس، ويكون نابع مني مش مفروض علي من حد لمجرد إعطائي الفرصة، ولذلك أعتز بالفيلم ده جدا، وفرحت لما تم اختياره من بين أفضل مائة فيلم في تاريخ السينما المصرية.

ـ هو بالفعل من علامات التغيير المهمة في السينما المصرية في وقت مبكر، حضرتك كنت في ذلك الوقت متأثر بأفلام التشويق الأمريكية، والبعض أشار إلى تأثيرك بالمدرسة الألمانية في السينما؟
ده صحيح، وأكثر ما استفدته هو الاهتمام بفكرة الإطار والشكل اللي بتقدم بيه قصتك، يعني حتى في بعض أفلامي اللي قالوا عليها أفلام سياسية، هتلاقيها محكية من خلال إطار وشكل فني، وأقدر ألخصه في إنك تقدم منذ البداية علامة استفهام تشد انتباه المتفرج وتخليه مع الفيلم من الأول، وده أكثر الأشكال السينمائية جاذبية بالنسبة لي. أنا فاكر إن أول فيلم لقيت نفسي فيه هو فيلم اسمه امرأة في النافذة Woman in the Window (من إخراج المخرج الألماني العظيم فريتز لانج الذي كانت له أفلام مهمة خلال عمله في السينما الألمانية لكنه أخرج هذه الفترة في الفترة التي انتقل فيها للعمل في هوليود عام 1944 من بطولة النجم إدوارد جي روبينسون).

ليه لقيت نفسي في هذا الفيلم؟ بسبب الشكل الإخراجي، هو اللي لفت نظري وخلاني تأثرت بمخرجه، ثم بكثير من المخرجين، لكن مش ده بس اللي دفعني لعمل أفلام يقال عليها بوليسية، والدليل كما قلت لك إنه حتى في بعض الأفلام التي وصفت بأنها سياسية، وأنا رافض إنه يقال عليها كده، كان ما يهمني هو أحكي القصة إزاي من خلال السيناريو، وطبعاً أنا كنت مشارك بشكل أساسي في كل سيناريوهات أفلامي، مش زي بعض المخرجين اللي ما بيشاركوش في السيناريو، ولذلك كانت فترة إعداد السيناريو بتاخذ شهور وأحياناً سنة وأحياناً سنة ونصف في فيلم من الأفلام.

ـ أي فيلم اللي استغرق الفترة الطويلة دي؟
فيلم الصعود إلى الهاوية.، قعدت في كتابته سنة ونصف وأعدت كتابته 6 مرات لغاية ما أنا حسيت بالمصداقية وبالإيقاع وبحاجات كثير.

ـ نرجع لفترة بعد نجاح (المنزل رقم 13)، يبدو إن نفور حضرتك من التكرار هو اللى خلاك تدخل مغامرة في الفيلم الثاني اللى هو فيلم "المؤامرة" اللى اعتبره بعض النقاد فيلم سابق لزمنه بكثير في مصر، خصوصًا في توظيف المؤثرات الصوتية؟
حاولت في الفيلم ده أخرج من الأسلوب المتكرر في الانتقال بين المشاهد، وهو أسلوب الإظلام والظهور، الـ Fade out والـ Back in وأعمل نقلات بين المشاهد بشكل مختلف، والبعض وصف ده بإنه تأثر بالموجة الجديدة في السينما العالمية، مع إني ما كنتش أعرف حاجة عن الموجة الجديدة اللي أفلامها ما كانتش بتعرض في مصر، كانت الحكاية بالنسبة لي هي رغبة في إني أعمل شيء مختلف في تتابع النقلات وفي استخدام الصوت للتضاد بين الفعل ورد الفعل، وكنت متحمس للتجربة، لكن الفيلم لم ينجح، مع إنه أقرب إلى النوعية اللي كانت سائدة وقتها من ناحية القصة، وكان سبب عدم نجاحه هو إنه تم عرضه في شهر مايو في سينما ديانا، اللي كانت أصلا بتعرض أفلام أجنبية، ولما أصحاب السينما تحمسوا له فعرضوه عندهم، لكن جمهور السينما لم يتحمس له، ووقتها كانت دور العرض جمهورها بيختلف حسب طبيعة دار العرض وطبيعة الأفلام اللي تعودت على عرضها، فجمهور الأفلام الأجنبية لم يتحمس للفيلم وقعد الفيلم أسبوع فقط، وأعتقد إن ده حصل بسبب إن منتج الفيلم كان ما عندوش إدراك لطبيعة سوق السينما.